Новая інфармацыйная гадзіна аб Дзіцячым прававым сайце адобрана на дзяржаўным узроўні

Тэматычная інфармацыйная гадзіна «Дзіцячы прававы сайт – дакраніся да міру права», распрацаваная Нацыянальным цэнтрам заканадаўства і прававой інфармацыі, рэкамендавана Міністэрствам адукацыі да выкарыстання педагогамі ўсіх школ Беларусі пры правядзенні выхаваўчай працы сярод навучэнцаў 3–6 класаў.

«Ініцыятыва Цэнтра накіравана на ўмацаванне прававой культуры падрастаючага пакалення і фарміраванне ў вучняў пазітыўнага ўспрымання заканадаўства краіны», – адзначыла начальнік упраўлення інфармацыйнай палітыкі і інтэрнет-рэсурсаў НЦЗПІ Наталля Баркоўская.

Уявіце, што ў інтэрнэце ёсць месца, дзе:

• пра законы расказваюць так, што зразумела нават трэцякласніку;
• можна гуляць у гульні і разгадваць рэбусы;
• ёсць карысныя відэа з TikTok і Instagram;
• можна задаць пытанне і атрымаць адказ.

Гэта Дзіцячы прававы сайт і яго сэрвісы!

Галоўная мэта інфармацыйнай гадзіны – з дапамогай адаптаваных лічбавых рэсурсаў сфарміраваць у школьнікаў разуменне важнасці правоў і абавязкаў, развіць маральныя якасці і навыкі працы з прававой інфармацыяй.

Канцэптуальны змест і практычнае значэнне

Інфармацыйная гадзіна аб Дзіцячым прававым сайце – гэта інтэрактыўны занятак для школьнікаў, накіраваны на знаёмства з інструментамі прававой асветы праз дзяржаўны інфармацыйна-прававы рэсурс mir.pravo.by у займальнай форме. Урок пабудаваны па прынцыпе «ад простага да складанага»: ад абмеркавання жыццёвых сітуацый – да гульні, віктарын і практычных заданняў на сайце. Навучэнцы самастойна даследуюць рэсурс і яго сацсеткі, вучацца знаходзіць і выкарыстоўваць адаптаваную прававую інфармацыю, адрозніваць правы і абавязкі дзіцяці, разумець асновы юрыдычнай адказнасці і г.д. Вынік: дзіця не проста даведваецца аб правах, а атрымлівае зручную лічбавую прыладу для іх абароны і рэалізацыі.

Асветніцкі і педагагічны патэнцыял 

Адабрэнне дадзенай інфармацыйнай гадзіны Міністэрствам адукацыі падкрэслівае курс на цыфравізацыю прававой асветы і ўкараненне ў адукацыйны працэс сучасных, дружалюбных для дзяцей рэсурсаў. Дзіцячы прававы сайт, які функцыянуе з 2008 года, працягвае заставацца ўнікальнай дзяржаўнай пляцоўкай, дзе заканадаўства становіцца зразумелым, а прававая культура - часткай паўсядзённага жыцця юных грамадзян.

Метадычныя матэрыялы і план-канспект інфармацыйнай гадзіны даступныя для запампоўкі на Дзіцячым прававым сайце ў раздзеле «Настаўнікам».